बर' सावथुन मुलुगाव गुबैयै सल' लिरगिरि, बिथोनगिरि आरो दिहुनगिरि बाइदि महरै गोबां खामानि मावनाइनि गेजेरजों दावगानो हानाइ आरो बांसिन मिथिजानाइ सासे बर' जोहोलाव मुश्री पंकज लाहारी। जोंनि सोंनायाव बिथाङा गावनि रावजों फिन्नाइ बिबुंथिखौ फोसावनाइ जाबाय।
मुं:- पंकज लाहारी।
बिमानि मुं:- दिप्ती रामसियारी।
बिफानि मुं:- केशब लाहारी।
गामि:- थैकाराकुछि, जिला:- बाकसा।
सोलोंथाइ:- B.Sc.
सावथुननि खामानिखौ माब्ला मावजेनदोंमोन:- सावथुननि रोसिआ आंनि सोलेराव उन्दै समनिफ्राइनो दंखायोमोन। थेवब्लाबो आं थाबैनो सावथुन मुलुगाव आगान होआखैमोन। सावथुननि गुदि गियान मोननाइनि उनावसो आं 2013 माइथायाव गिबि खेबनि थाखाइ सावथुननि खामानिखौ मावजेननो आखाइआव लादोंमोन।
सोरनिफ्राइ थुलुंगा मोनदोंमोन:- आंनि गोसोआनो आंनि सावथुन दिहुननाइनि थुलुंगागिरि। थोंजोंङै आंखौ रावबो गिबि सावथुन दिहुननायाव थुलुंगा होआखै। आं गावनो गोसो जानानैसो बे सावथुन मुलुगाव आगान होदोंमोन।
दासिम मा मा सावथुननि खामानि मावखो:- 2013 माइथाइनिफ्राइ 2019 माइथाइसिम आं गासै गां 6 सावथुन दिहुनबाइ। बिफोरनि फारिलाइजों लोगोसे दिहुननाइ माइथाइ, आंनि बिबानफोर आरो बिबुंथि होनाइ जाबाइ।
1. गिबि सावथुन:- जोखोम, 2014, लेङाइ बिथोनगिरि(Astt. Director), Story, Script.
बे सावथुनखौ जों सा 5 सुबुं लोगो नांनानै “Five Star Film Production”नि सिङाव दिहुनदोंमोन। गिबि सावथुन महरै बे सावथुना नाइगिरिफोरनि गोबां अनसाइनाइ मोनदोंमोन।
2. नैथि सावथुन:- जिनिर, 2015, Story, Script, Direction. बे सावथुनाव हौआ फावगिरिनि बिदा महरै आं फाव खालामदोंमोन। Marketआव बे सावथुना Great success जादोंमोन।
3. थामथि सावथुन:- रेगा 1986, 2016, Story, Script, Direction.
खष्टनि फिथाइआदि गोदै बेखौ आं नैबे सावथुननि जोहै बुजिना मोनदोंमोन। बे सावथुनखौ खेबनाइ समाव गोबां जेंना जेंसि सौसिनो गोनां जादोंमोन। गोसोनि बोलो आरो इश्बोरनि अनसाइनायाव गासै जेंनाखौ सौसिनानै उनाव जों देरहानाइनि फिथाइखौ मोनदोंमोन।
4. ब्रैथि सावथुन:- लोरगि दिङा, 2017, Story, Script, Direction, बे सावथुननि इसे बाहागो जोंनि नखरनि जीउ जारिमिनजों गोरोबनाइ।
5. बाथि सावथुन:- बीर:- 2018, Story, Script, Direction, 2018 माइथाइनि Best Bodo Film बिमुंखौ बि सावथुना मोननो हादोंमोन।
6. ड’थि सावथुन:- गानजा फाग्ला, 2019, Story, Script, Direction, बे सावथुनखौ Dhiraj Productionनि सिङाव दिहुननाइ जादोंमोन। Dhiraj Borgoyariआ बे सावथुनखौ Financed खालामदोंमोन। बे सावथुना राइजो राजानिफ्राइ थोजासे अनसाइनाइ मोनदोंमोन।
दासिम दिहुननाइ साबसिन सावथुन:- Best Story होनना बुङोब्ला आं “Rega 1986”खौ बुंनांगोन। Best Popular बुङोब्ला आं “गानजा फाग्ला”नि मुं लागोन आरो गासैबो बिथिंखौ बिजिरनानै नायोब्ला “बीर” सावथुना बइनिख्रुइबो Best जादों बुंजायो।
गुबुन हुदा:- गुबैयै सावथुन बिथोन होनाइ एबा सावथुन लिरनाइनि अनगायैबो आं खुदियाफोरखौ H.S. Pass जानाइनि उननिफ्राइनो नखराव रांआरी मदद होनो थाखाइ आं Tution खालामनो लादोंमोन आरो बे हुदाखौ आं दासिमबो नागारनो हायाखै। बेनि अनगायैबो मेथाइ लिरनाइ, मेथाइ रोजाबनाइ, मोसानाइ, फेस्ला खालामनाइ बेफोर माखासेआबो आंनि हुदानि फारिआव गोलैयो।
गोदान सावथुननि थांखि:- 2020 माइथाइआव गोदान सावथुन महरै दं “बिसम्बि”। बे सानथुनखौ Dhiraj Borgoyari आदाया Finance खालामदों। Story, Script, Direction बे मोनथाम बिबाना आंनि। 90% Shootingआ जोबनानै थांबाइ, नाथाइ Covid-19नि थाखाइ 10% Shootingआ दाबो जोबनानै थांथ’आखै।
दासिम बर’ सावथुननि थासारिआ मा:- बर’ सावथुननि थासारिखौ ना बांद्राइ मोजां बुंजायो ना बांद्राइ गाज्रि, गेजेरावनो दं होननानै बुंनांगोन।
बर’ सुबुंनिसिम बोसोन:- गासै बर’ सुबुंनिसिम आंनि मोनसेल’ बोसोन, जाहाथे बर’ सावथुननि मुलुगा थांनानै थायो, बइबो सावथुनखौ अनसाइ। जेरावनो सुबिधा मोनो बियावनो सावथुन नाइ। माबाफोर गोरोन्थि नुयोब्ला जाहाथे आसि दिन्थिना होयो। जेब्ला मोनसे सावथुना Marketआव मोजां लाभा-लाभ जागोन अब्लासो मोनसे Production Houseआ थांनानै थागोन आरो Production Houseआ थांनानै थायोब्लासो बर’ सावथुन मुलुगा थांनानै थागोन। बिनि गुबै बिबाना गासै बर’ सुबुंफोरनि सायाव थाहैबाइ।
बेनि अनगायैबो आं Govt.खौ खावलायो दाब दाब जायगायाव जाहाथे Mini Cinema Hall लुफुंना होयो, Production Houseफोरखौ Financial Support होयो।
* * * * * * * * |
